தலைமன்னார் அருகே, இராமேஸ்வரம் மீனவர்கள் மீது இலங்கை மீனவர்கள் பெட்ரோல் குண்டுகளை வீசி தாக்குதல் நடத்தியுள்ளனர்.

ராமேஸ்வரத்திலிருந்து அறுநூறுக்கும் மேற்பட்ட விசைப்படகுகள், நேற்று கடலுக்கு மீன் பிடிக்கச் சென்றுள்ளன. கச்சத்தீவு அருகே, அவர்கள் மீன் பிடித்துக் கொண்டிருந்த போது,இலங்கை கடற்படைக் கப்பலில் வந்த இலங்கைக் கடற்படையினர், கல், கட்டைகளைக் கொண்டு அவர்களைத் தாக்கியதாக கூறப்படுகிறது. அதனால் அதிர்ச்சியடைந்த மீனவர்கள், தலைமன்னார் பகுதிக்குச் சென்று மீன் பிடிக்கச் சென்றுள்ளனர். சுமார் நான்கு படகுகளில் அங்கு வந்த இலங்கை மீனவர்கள், பெட்ரோல் குண்டுகளை வீசி தாக்குதல் நடத்தியுள்ளனர்.
இந்தத் தாக்குதலில், ஒரு படகு சேதமடைந்ததாகவும் ஒரு மீனவருக்கு காலில் காயம் ஏற்பட்டுள்ளதாகவும் கூறப்படுகிறது.

ஜல்லிக்கட்டு போட்டி நடத்த உயர்நீதிமன்றம் உத்தரவு

மதுரை அனங்காநல்லூர் உள்ளிட்ட இடங்களில் ஜல்லிக்கட்டு நடத்த உயர்நீதிமன்றம் அனுமதி அளித்துள்ளது.
ஜல்லிக்கட்டு போன்ற விளையாட்டுகள்,விலங்குகளை வதைத்து நடத்தப்படும் நிகழ்ச்சிகளுக்கு தடை விதித்து உச்ச நீதிமன்றம் ஏற்கெனவே தீர்ப்பு வழங்கியிருந்த நிலையில், திருச்சி, மதுரை ஆட்சியர்கள் வரும் பொங்கல் உழவர் திருநாளை முன்னிட்டு ஜல்லிக்கட்டுக்கு அனுமதி அளித்திருந்தனர்.
இதனை எதிர்த்து விலங்குகள் நல வாரிய உதவி செயலாளர் வினோத்குமார் மதுரை உயர்நீதிமன்றக் கிளையில் மனு தாக்கல் செய்திருந்தார்.மேலும், சிவகங்கையைச் சேர்ந்த அம்பலத்தரசு என்பவர் ஜல்லிக்கட்டு என்பது தமிழர் வீர விளையாட்டு என்பதாக, ஜல்லிக்கட்டுக்கு நடுவண் அரசு விதித்துள்ள தடையை ரத்து செய்யக்கோரி மனு தாக்கல் செய்தார்.
ஜல்லிக்கட்டு குறித்த இந்த இரு மனுக்கள் மீதான விசாரணை மதுரை உயர்நீதிமன்றக் கிளையில் நேற்று இன்றும் நடைபெற்றது.இதனை விசாரித்த நீதிபதிகள் அலங்காநல்லூர், சிவகங்கை உள்ளிட்ட இடங்களில் ஜல்லிகட்டு நடத்த அனுமதி அளித்துள்ளனர். மேலும் 15, 16, 17- ஆகிய தேதிகளில் நடைபெறும் ஜல்லிக்கட்டு குறித்தும், அதன் பாதுகாப்பு குறித்தும் நீதிமன்றத்தில் அறிக்கை தாக்கல் செய்ய வேண்டும் என்றும் நீதிபதிகள் உத்தரவிட்டுள்ளனர்.
                                          நன்றி
                   தமிழன் தொலைக்காட்சி